Sunday, October 3, 2010

പൂവ് പറയാതെ പോയത്

ചെടിയില്‍ നിന്നടര്‍ത്തി മാറ്റി
പൂവിനെ പ്രണയിക്കുന്നവരല്ലേ നിങ്ങള്‍?
തണ്ടൊടിഞ്ഞ വേദനയില്‍
പൂവ് നീറുമ്പോള്‍
അഭിമാനത്തോടെ നിങ്ങളതിനെ
പ്രിയതമയുടെ മുടിക്കെട്ടിലോ
ദേവന്റെ കാല്ച്ചുവട്ടിലോ അര്‍ച്ചിക്കുന്നു.
കാറ്റും വെയിലും മഴയും
കിനാവ്‌ കണ്ടവള്‍,
കബരീ ഭാരത്തില്‍
വാടി ഉണങ്ങുകയോ
ഇലച്ചീന്തില്‍ പ്രസാദം ആവുകയോ ചെയ്യുന്നത് ആരറിയുന്നു?
വണ്ടുകള്‍ നുകരാതെ പോയ തേന്‍കണങ്ങള്‍
കരിഞ്ഞുണങ്ങും മുന്‍പേ
ഉറുമ്പിന്‍ കൂട്ടത്തിനു
തീന്‍ മേശ ഒരുക്കിയേക്കും...