Saturday, February 28, 2009

മുഖം മൂടികള്‍

മറക്കാന്‍ ഒരു മരുന്ന് ...
വ്യര്‍ഥമായ അലച്ചിലിനൊടുവില്‍
വഴി വാണിഭക്കാരന്റെ കയ്യിലെ
മാന്ത്രിക മുഖം മൂടി വാങ്ങി..

വില
പേശുവനായി പറഞ്ഞതാവാം
ഒരു വേള ധരിച്ചാല്‍ പിന്നെ മാറ്റുകയെ വേണ്ട
വെള്ളത്തില്‍ അലിയില്ല..
കൊടുംകാറ്റിലും പറക്കില്ല..
പഴയ മുഖം വേണമെന്ന് ശറിക്കരുതെന്ന് മാത്രം

കൂട്ടത്തില്‍ ചന്തമുള്ളത് ഒന്നെടുത്തു
മായാത്ത ചിരി വേണം
കണ്‍ കോണുകളില്‍ മഴ ചാറല്‍ ഇല്ലാത്ത ഒന്ന്
പാകമായ ഒന്നെടുത്തു ..
വേഗത്തില്‍ മുഖം ഒളിപ്പിച്ചു

മാറിയ മുഖമറിയാതെ എന്നെ തിരഞ്ഞു
ഓര്‍മ്മകള്‍ പല വഴി ചിതറി ഓടുന്നത് കണ്ടു‌

Friday, February 6, 2009

ഹൃദയം

എരിഞ്ഞടങ്ങുന്ന ഓരോ പകലിലും
ആര്‍ത്തിയോടെ നീ കൊത്തി വലിച്ചു
വിശപ്പടക്കുന്നതെന്റെ ഹൃദയമാണ്
ഓരോ പ്രഭാതത്തിലും നിന്റെ കൊക്കിന്റെ കാഠിന്യം
ഉരച്ചു നോക്ക്കുവാനുള്ള വാശിയോടെ
പുനര്‍ജനിക്കുന്നതും എന്റെ ഹൃദയമാണ്
രാവിന്റെ ശൈത്യവും
കടല്‍ കാറ്റിലെ ഉപ്പും
പുനര്‍ജനിക്ക് കാവലിരിക്കുമ്പോള്‍
നീണ്ടു കൂര്‍ത്ത നിന്റെ കൊക്കുകള്‍
എന്നെ ഭയപ്പെടുത്തുന്നില്ല...